[Congreso internacional] A proposta reformada para a modernización de obrigacións e contratos

Os próximos 9 e 10 de xullo de 2024 celebraremos, como colofón aos seminarios mensuais realizados entre xaneiro e xuño, o Congreso Internacional "A Proposta de Modernización do Código civil en materia de obrigacións e contratos de 2023. Algunhas cuestións previas".

 

No seo do Congreso tratarase o procedemento lexislativo co que se podería acometer a mencionada reforma do CC, a cuestión competencial, a relación da proposta coa lexislación de protección de consumidores, coa lei de condicións xerais da contratación e con outras leis. Ademais, abordarase a relación entre a teoría xeral do contrato e a regulación dos contratos especiais. Na segunda xornada, a do mércores 10 de xullo, expoñeranse os problemas de dereito transitorio en caso de aprobarse a proposta, as cuestións de dereito internacional privado e dereito interregional e, como colofón, lanzaremos ao aire a seguinte pregunta: é tempo de codificar?

 

Para o tratamento destes temas contaremos con expertos relatores provenientes de universidades españolas, italianas e francesas, dado que ao longo das mesas de relatorio trataranse os temas tamén desde a perspectiva do dereito comparado.